मतदाता शिक्षाका लागि आयोगले बनायो निर्देशिका

काठमाडौं- निर्वाचन आयोगले निर्वाचन तथा मतदाता शिक्षा सम्बन्धी विभिन्न निर्देशिका स्वीकृत गरेको छ। स्थानीय तह निर्वाचनलाई व्यवस्थित र प्रभावकारी बनाउनका लागि निर्देशिकाहरू तयार गरिएको जानकारी आयोगले गराएको हो। सोमबार आयोगमा भएको नियमित पत्रकार सम्मेलनमा आयोगका प्रवक्ता शालिग्राम शर्मा पौडेलले यस्तो जानकारी दिएका हुन्।

'आयोगलाई स्थानीय तह निर्वाचन २०७९ लाई व्यवस्थित र प्रभावकारी तरिकाले सम्पन्न गर्न आवश्यक पर्ने निर्वाचन तथा मतदाता शिक्षा निर्देशिका २०७८, निर्वाचन तालिम व्यवस्थापन तथा सञ्चालन निर्देशिका २०७८, मतदान निर्देशिका २०७८ र मतगणना निर्देशिका २०७८ आयोगबाट स्वीकृत भई कार्यान्वयनमा आएका छन्,' प्रवक्ता शर्माले भने। 

प्रवक्ता पौडेलले स्थानीय तह निर्वाचन २०७९ का लागि आवश्यक मतपत्र छपाइ कार्यक्रम जनक शिक्षा सामग्री केन्द्रमा शुरु भई छपाइ कार्य जारी रहेको जानकारी दिए। निर्वाचनका लागि कुल २३ लहर समूहका ७७ प्रकारका १ करोड ९४ लाख थान मतपत्र छपाइ हुने र सबैभन्दा कम १६ लहरको मतपत्र डोल्पाको हुने र सबैभन्दा बढी ५६ लहरको मतपत्र काठमाडौंको हुने बताए।