ओमनविरुद्ध नेपाललाई ९ विकेटको जित

काठमाडौं- विश्वकप छनोटमा बाहिरिए पनि नेपालले ओमनलाई हराउँदै प्रतियोगिताको तेस्रो स्थान हात परेको छ। ओमनको अल अमरेत मैदानमा बिहीबार सम्पन्न खेलमा नेपालले ओमनलाई ९ विकेटले हराएर जित हात परेको हो।

आईसीसी टी-२० विश्वकपको ग्लोबट छनोटबाट बाहिरिसकेको नेपालले खेलमा ८८ रनको लक्ष्य पाएको थियो। जवाफमा एक मात्र विकेट गुमाएर २२ बल बाँकी रहँदै नेपालले निधारित लक्ष्य पूरा गर्‍यो।

टस जितेर ब्याटिङ रोजेको ओमनले पूरा ओभर खेल्दै ९ विकेट गुमाएर ८७ रन बनाएको थियो। ओमनका लागि जिसम मक्सुदले २१ रन बनाए भने आयन खानले १६ रनको योगदान दिए। त्यस्तै, निशम खुसीले १५ रन बनाए।

नेपाली टिमका कप्तान सन्दीप लामिछानेले तीन विकेट लिँदा कमल सिंह ऐरी, आरिफ शेख, अभिनास बोहरा र सागर ढकालले समान १–१ विकेट गिराए।

जवाफमा नेपालका कुशल भुर्तेलले अविजित ५५ रन बनाए भने आरिफ शेखले १३ रनको योगदान दिए। त्यस्तै आशिफ शेखले अविजित २१ रन बनाए। नेपालको एक मात्र विकेट जिसम मक्सुदले गिराएका थिए।