च्याम्पियन्स लिगः बराबरीमा रोकिए एट्लेटिको र म्यानचेस्टर युनाइटेड

काठमाडौं- युरोपेली च्याम्पियन्स लिगअन्तर्गत बुधबार राति सम्पन्न खेलमा एट्लेटिको मड्रिड म्यानचेस्टर युनाइटेडसँग बराबरीमा रोकिएको छ। एट्लेटिकोको मैदानमा सम्पन्न खेलमा युनाइटेडले पुनरागमन गोल गरेपछि खेल १-१ को बराबरीमा रोकिएको हो।

वान्डा मेट्रोपोलिटानो रंगशालामा खेलको सातौं मिनेटमा गोल गर्दै एट्लेटिकोले अग्रता बनाएको थियो। यससँगै पहिलो हाफमा एट्लेटिको एक गोलले अघि रह्यो।

तर खेलको ८०औं मिनेटमा युनाइटेडका एन्थोनी एलान्गाले गोल गरेपछि खेल बराबरी भएको थियो। अब यी दुई टिमबीचको दोस्रो लेगको खेल युनाइटेडको मैदानमा मार्च १६ तारिखमा हुनेछ। त्यो खेलमा जित निकाल्ने टिम अन्तिम आठमा प्रवेश गर्नेछ।

गएराति नै सम्पन्न भएको च्याम्पियन्स लिगकै अर्को खेलमा बेन्फिका र आयाक्सले बराबरी खेलेका छन्। बेन्फिकाको मैदानमा भएको खेलमा आयाक्सले दुई पटक अग्रता बनाए पनि घरेलु टिमले पुनरागमन गोल गर्दै खेललाई बराबरीमा रोकेको हो।

बेन्फिकाका लागि एक गोल भने आयक्सका सेबास्टियन हलरले आत्मघाती गोल गरेका थिए।