ए डिभिजन लिग : विभागीय डर्बीमा एपीएफ र पुलिस भिड्दै, आर्मीले संकटाको सामना गर्ने

काठमाडौं- सहिद स्मारक ए डिभिजन लिगअन्तर्गत १२औं चरणका अन्तिम खेल आज हुँदैछन्। त्रिपुरेश्वरस्थित दशरथ रंगशालामा दिउँसो १ बजे सुरु हुने विभागीय डर्बीमा नेपाल पुलिस क्लबले एपीएफ क्लबको सामना गर्नेछ।

अंकतालिका र्हेर्ने हो भने दुवै टिम औसतभन्दा तल छन्। यद्यपी पुलिसभन्दा एपीएफ अगाडि छ। ११ अंक बनाएको पुलिस ११औं स्थानमा छ भने १४ अंक भएको एपीएफ आठौं स्थानमा छ। त्यसो त एपीएफले सुरुबाटै आठौं स्थानका लागि खेलिरहेको थियो। पछिल्लो वर्ष रेलिगेसनबाट बँच्नका लागि ठूलो संघर्ष गरेको एपीएफले यो सिजनको लिग सुरु हुँदा त्यस्तै संघर्ष गर्नुपरेको थियो।

तर विदेशी खेलाडी ल्याएर र आफ्नो टिममा केहि परिवर्तन गरेर उसले पछिल्लो समय उत्कृष्ट नतिजा निकालिरहेको छ। त्यसैले एपीएफ त्यो लय कायम राख्न चाहन्छ।

यता पुलिस शीर्ष तीनको लक्ष्यका साथ लिगमा होमिए पनि उसले रेलिगेसनको संघर्ष गर्नुपर्यो। त्यसैले आजको खेलमा जित निकाल्दै एपीएफ एक स्थान सुधार गर्न चाहन्छ भने पुलिस पनि स्थान सुधार गर्ने बाटोमा हुनेछ।

मंगलबार पौने पाँच बजे हुने खेलमा भने त्रिभुवन आर्मी क्लबले संकटाक्लबको सामाना गर्नेछ। लिगको सुरुआतमा लामो समय हार नबेहोरेको संकटाले पछिल्लो समय दुई हारको सामना गरिसकेको छ।

यता, मछिन्द्रपछि अहिले एकमात्र अपराजित क्लब आर्मी हो। आर्मीले सात खेलमा बराबरी गरे पनि हार भने बेहोरेको छैन। अहिले आर्मी चौथो स्थानमा छ त्यसैले ऊ अब आफ्नो स्थान सुधार गर्न चाहन्छ। आजको खेलमा जित निकाल्न सके आर्मी दोस्रो स्थानमा पुग्नेछ।

लिग सकिन एक खेलअगावै उसले दोस्रो स्थान सुरक्षा गरे आर्मी लक्ष्यमा कायम रहनेछ। यता संकटाको लक्ष्य भनेको तेस्रो स्थान हो। तर ऊ अहिले १५ अंकका साथ सातौं स्थानमा छ। दुई हारबाट गुज्रिएको संकटाले लक्ष्य भेट्टाउने सम्भावना किनै कम छ। किनभने आज जित निकाल्न सके पनि संकटा सातौं स्थानमै कायम रहनेछ।