लिग वानमा पीएसजी पराजित

काठमाडौं- फ्रेन्च शीर्ष डिभिजनको फुटबल लिग वानमा पेरिस सेन्ट जर्मेन पीएसजी शनिबार राति पराजित भएको छ। लिग वानअन्तर्गत नान्टेसको मैदानमा सम्पन्न खेलमा पीएसजीले घरेलु टिमसँग ३-१ को हार बेहोरेको हो।

खेलमा पीएसजीका लागि नेयमारले एकमात्र गोल फर्काए। उनले दोस्रो हाफमा गोल गरेका थिए। त्यसपछि खेलको ६०औं मिनेटमा पीएसजीले पेनाल्टीको अवसर पाए पनि नेयमारले गोल गर्न सकेनन्। यससँगै पीएसजीले पुनरागमनको अवसर गुमाएको हो।

त्यसअघि खेलका पाँचौँ मिनेटमै नान्टेसका कोलो मुनाईले गोल गर्दै घरेलु टिमलाई अग्रता दिलाएका थिए। त्यस्तै, १७औं मिनेटमा क्वेन्टिन मेर्लिनले गोल गरे भने पहिले हाफको इन्ज्युरी समया लुडोविच ब्लासले तेस्रो गोल गरे। यो गोलसँगै पीएसजी पहिले हाफमै तीन गोलले पछि परेको थियो।

यता पहिलो हाफको अन्तिममा मिनेटमा डी अपाहाले पाएको रातो कार्ड भने रद्द गरिएको थियो। यससँगै घरेलु टिम १० खेलाडीमा समेटिनबाट जोगियो।

गएरातिको हारका बाबजुद पीएसजी ५९ अंकका साथ शीर्ष स्थानमा छ। दोस्रो स्थानको मार्सेको ४६ अंक छ। नान्टेस भने ३८ अंकका साथ पाँचौँ स्थानमा छ।