नामाकरणको टुंग्याउन प्रदेश १ मा सर्वदलीय बैठक आह्वान

विराटनगर- प्रदेश १ को नामाकरण टुंग्याउन प्रदेश सरकारले सर्वदलीय बैठक आह्वान गरेको छ। आगामी १० फागुन मध्यान्ह १२:१५ बजे बस्ने गरी बैठक आह्वान गरिएको हो।

समन्वय एवं सहजीकरण गरेर नामको विषय टुंगोमा पुर्‍याउनलाई प्रदेश मन्त्रिपरिषद् बैठकले गत माघ १६ गते तत्कालीन सामाजिक विकास मन्त्री जयराम यादवलाई जिम्मा दिएको थियो।

यादव नेतृत्वको समन्वय एवं सहजीकरण समितिले सर्वदलीय बैठक आह्वान गरेको छ। मुख्यमन्त्री राजेन्द्रकुमार राईलेसमेत प्रदेशको नाम टुंगो लगाउन पहल गरिरहेका छन्। मुलुकका ७ प्रदेशमध्ये ६ वटाले नाम पाइसक्दा प्रदेश १ मात्र नामविहीन छ।

अहिलेसम्म प्रदेशले तीन मुख्यमन्त्री पाइसक्दा पनि नाम भने पाउन सकेको छैन।