पूर्वकप्तान हरि खड्का नक्कली शैक्षिक प्रमाणपत्र केसमा दोषी ठहर

काठमाडौं– राष्ट्रिय फुटबल टोलीका पूर्वकप्तान तथा नेपाली महिला फुटबल टिमका पूर्वप्रशिक्षक हरि खड्काको शैक्षिक प्रमाणपत्र नक्कली भएको ठहर भएको छ। 

खड्काविरूद्ध विशेष अदालतमा दायर भएको मुद्दाको सुनुवाई गर्दै न्यायाधीशद्वय अब्दुल अजिज मुसलमान र नित्यानन्द पाण्डेयको संयुक्त इजलासले खड्कालाई दोषी ठहर गरेको हो।

उनले नक्कली शैक्षिक प्रमाणपत्र पेस गरेर प्रहरी सहायक निरीक्षक (असई) मा नियुक्त भएको आरोपमा खड्काविरूद्ध अख्तियार दुरूपयोग अनुसन्धान आयोगले अदालतमा मुद्दा दायर गरेको थियो। 

माघ १२ गते अख्तियारले विशेष अदालतमा खड्काविरूद्धको अभियोगपत्र पेस गरेको थियो। खड्का भारतको माध्यमिक शिक्षा परिषद् वाराणसी उत्तर प्रदेशबाट जारी भएको आईएको नक्कली प्रमाणपत्र पेस गरी प्रहरीमा भर्ना भएको अख्तियारको अनुसन्धानले देखाएको थियो।

खड्का २०५५ साल कात्तिक १ गते असईमा भर्ना भएका थिए। उनी महानगरीय प्रहरी गण नम्बर २ मा दरबन्दी भई राष्ट्रिय प्रहरी प्रशिक्षण प्रतिष्ठान केन्द्रीय खेलकुद गतिविधिमा कार्यरत थिए। खड्का २०५९ साल पुस १४ गते प्रहरी नायब निरीक्षक पदमा बढुवा भएका थिए। अहिले भने उनी सेवानिवृत्त भइसकेका छन्।

सन् २००३ देखि २००६ सम्म नेपाल पुलिस क्लबबाट फुटबल खेलेका खड्का त्यसपछि ६ वर्ष पुलिस फुटबल टिमको व्यवस्थापकीय भूमिकामा थिए। त्यसपछि उनले जागिरबाट राजीनामा दिए। उनी गत वर्ष राष्ट्रिय खेलकुद परिषद् (राखेप) को बोर्ड सदस्यसमेत नियुक्त भएका थिए। मन्त्रिपरिषद् बैठकले उनलाई राखेपको सदस्यमा नियुक्त गरेको थियो।

खड्का अन्तर्राष्ट्रिय फुटबल प्रतियोगितामा नेपालको तर्फबाट सर्वाधिक गोलकर्तामध्येका एक खेलाडी हुन्। सन् १९९५ देखि २००६ सम्म नेपाली राष्ट्रिय टिमबाट खेल्दा खड्काले अन्तर्राष्ट्रिय फुटबलमा १३ गोल गरेका छन्। 

खड्का नेपाली राष्ट्रिय महिला फुटबल टिमका पूर्व प्रशिक्षक हुन्। नेपालमा २०७६ मंसिर १५ देखि २४ गतेसम्म भएको १३ औं दक्षिण एसियाली खेलकुद ९साग०पछि खड्काले प्रशिक्षकबाट राजीनामा दिएका थिए।