जिप दुर्घटनामा मृत्यु हुनेको संख्या आठ पुग्यो, सातजनाको सनाखत

काठमाडौं- प्युठानमा बेहुली लिएर फर्किँदै गरेको जिप दुर्घटना हुँदा मृत्यु हुनेको संख्या ८ पुगेको छ। ६ जनाको घटनास्थलमै र २ जनाको उपचारका क्रममा मृत्यु भएको जिल्ला प्रहरी कार्यालय प्युठानले जनाएको छ।

मृत्यु हुनेमा ५ महिला र ३ जना पुरूष छन्। दुर्घटनामा परी ज्यान गुमाउनेमा वसन्ती खड्का (३९), केशरी खड्का (२९), बलबहादुर बुढा मगर (५०), खिम खत्री (३२), नन्दी खड्का (५०), वसन्त खड्का (३९) र एलिना खड्का (१३) छन्। एक जना मृतकको सनाखत हुन सकेको छैन।

जिपमा सवार अन्य ५ जना गम्भीर घाइते भएका छन्। घाइते हुनेहरूमा रिमा जिसि, नरेश खड्का, दलबहादुर खड्का, हरि बुढामगर र सावित्रा जिसी छन्। बेहुला बेहुली दुवै घाइते रहेको बताइएको छ।

नौबहिनी गाउँपालिकाको लुङबाट बेहुली लिएर गौमुखी गाउँपालिकाको लिवाङ जाँदै गरेको ग १ ज ५०९२ नम्बरको जिप शुक्रबार राति ओखरपाटामा दुर्घटना भएको हो।