टिपरको ठक्करबाट आँगनमा आगो तापिरहेका दुईजनाको मृत्यु

काठमाडौं– बर्दियाको बढैयाताल गाउँपालिका–३ सतपतियामा टिपरको ठक्करबाट दुईजनाको मृत्यु भएको छ। घरको आँगनमा आगो तापिरहेका बेला उनीहरुलाई टिपरले ठक्कर दिएको हो। 

मृत्यु हुनेमा ४५ वर्षीय रामु थारु र सोमबहादुर बिक छन्। सोमबार साँझ आँगनमा आगो तापिरहेका उनीहरुलाई एक्कासि टिपरले ठक्कर दिएको थियो। सोमबहादुर घटनास्थलमै र रामुको नेपालगञ्जस्थित मेडिकल कलेजमा उपचारका क्रममा मृत्यु भएको हो।

दुर्घटनमा तीनजना घाइते भएको बताइएको छ।  जिल्ला प्रहरी कार्यालय बर्दियाका अनुसार घाइते हुनेमा स्थानीय ३५ वर्षीया प्रमिला चौधरी, ४० वर्षीया चमेलिया थारु र सुर्खेतको विरेन्द्रनगर नगरपालिका–११का १९ वर्षीय लक्ष्मण सुनार छन्। लक्ष्मण टिपरका सहचालक हुन्।

भे १ क १४९५ नम्बरको टिपर सुर्खेतबाट जमुनी बर्दियाको भित्री सडकतर्फ गइरहेको थियो। टिपर चालक ३३ वर्षीय दुर्गा विक प्रहरीको नियन्त्रणमा छन्। प्रहरीका अनुसार टिपर अनियन्त्रित भई सडक किनारमा पुगेको थियो। चालक बिकले मादक पदार्थ सेवन गरर टिपर चलाएको पाइएको छ। टिपरको मेकानिकल परीक्षण गरेपछि थप कुरा थाहा हुने प्रहरीले बताएको छ।

घटनास्थल क्षेत्रका स्थानीय दोषीलाई हदैसम्मको कारवाहीको माग गर्दै सडकमा उत्रिएका छन्।