लुम्बिनी गुरुयोजनाको काम चाँडो सक्न कांग्रेसको आग्रह

बुटवल- नेपाली कांग्रेस लुम्बिनी प्रदेश समितिले लुम्बिनी गुरुयोजनाका काम छिटो सक्न र पर्यटन प्रवर्द्धनका काम अगाडि बढाउन आग्रह गरेको छ। लुम्बिनी गुरुयोजनाको काममा भएको ढिलासुस्तीप्रति कोषको ध्यानाकर्षण गराउँदै कांग्रेस प्रदेश समितिले छिटो काम सक्न आग्रह गरेको हो।

लुम्बिनी विकास कोषका पदाधिकारी तथा कर्मचारीहरुसँगको छलफलमा नेपाली कांग्रेस लुम्बिनी प्रदेश सभापति अमरसिंह पुनले लुम्बिनी गुरुयोजनालाइ पूर्णता दिन आग्रह गरे। लुम्बिनीको विकाससँगै प्रदेशमा पर्यटन प्रवर्द्धनका कार्यक्रम अगाडि बढाउनुपर्नेमा जोड दिए।

'लुम्बिनीको विकासमा कांग्रेसले सदैव सहयोगी भूमिका खेल्छ। विकासका नाममा हुने बेथिति र ढिलासुस्ती भने कांग्रेसलाई स्वीकार्य छैन,' पुनले भने। लुम्बिनी आउने पर्यटकलाई प्रदेशका सबै जिल्लामा पुर्‍याउने वातावरण विकास कोषले तयार गर्नुपर्ने उनले बताए। 

कार्यक्रममा लुम्बिनी विकास कोषका योजना प्रमुख सरोज भट्टराईले लुम्बिनी गुरुयोजनाको ८१ प्रतिशत काम सकिएको बताए। इन्जिनियर भट्टराईले दुई वर्षमा गुरुयोजनाको सम्पूर्ण काम सक्ने योजना रहेको बताए। गुरुयोजना अन्तर्गत हालसम्म ५ अर्ब ४३ करोडको बजेट अनुरुपका काम सम्पन्न भएको र बाँकी १९ प्रतिशत कामका लागि साढे सात अर्ब बजेटको आवश्यकता पर्ने भट्टराइले जानकारी दिए।