जनकपुरधाम– जबरजस्ती करणीको मुद्दा लगाइदिन्छु भनी ठगी गरेको आरोपमा सप्तरीमा एक महिला र एक पुरुष पक्राउ परेका छन्।
पक्राउ पर्नेमा सप्तरीको खडक नगरपालिका–९ लालपट्टीका ३२ वर्षीय मो. रहमान मियाँ र २५ वर्षीया रुबिना खातुन रहेको जिल्ला प्रहरी कार्यालय सप्तरीका प्रहरी प्रवक्ता प्रहरी नायव उपरीक्षक माधव प्रसाद काफ्लेले जानकारी दिए।
दुवैजनालाई पीडितको जाहेरीको आधारमा पक्राउ गरिएको प्रवक्ता काफ्लेले जनाएका छन्। रुबिना खातुन र रहमान मिया मिलेर पीडितसँग एक लाख ठगी गरेको बताइएको छ।
रुबिना खातुनले आफ्नो मोबाइलबाट खडक नगरपालिका वडा नम्बर ९ का समसुल मियाकी श्रीमती गुलेसा खातुनको मोबाइलमा फोन गरी तिम्रो लोग्नेले मलाई जबरजस्ती करणी गरेको छ, मुद्दा मिलाउने हो भने मलाई ४ लाख रुपैयाँ दिनुपर्छ भनी बार्गेनिङ गरेकी थिइन्।
रुपैयाँ नदिए जबरजस्ती करणी मुद्दा लगाई श्रीमानलाई जेल पठाइदिन्छु भनेर रुपैयाँ ठगेको प्रहरीले जनाएको छ। रुबिनाले गुलेसासँग २ लाख बार्गेनिङ गरी मंसिर १० गते १ लाख रकम लिई ठगी गरेको प्रवक्ता काफ्लेले जनाएका छन्।