जनकपुरधाम- विवाहपञ्चमी महोत्सव अन्तर्गत रंगभूमि मैदान बाह्रबिघामा स्वयंवर सम्पन्न भएको छ। राम जानकीको स्वयंवर हेर्नका लागि श्रद्धालुहरुको निकै ठूलो भिड देखिएको छ।
स्वयंवरका लागि मिथिला दरबारको प्रतिनिधित्व गर्ने जानकी मन्दिर र अयोध्या दरबारको प्रतिनिधित्व गर्ने राम मन्दिरबाट छुट्टाछुट्टै डोला रंगभूमि मैदानमा पुगेको थियो।
जानकी मन्दिर डोलाको नेतृत्व जानकी मन्दिरका उत्तराधिकारी महन्थ रामरोशन दास वैष्णव र राम मन्दिर डोलाको नेतृत्व राम मन्दिरका महन्थ राम गिरीले गरेका थिए। राम मन्दिरका डोलासँगै अयोध्याबाट आएका जन्तीहरू पनि सहभागी थिए।
स्वयंवरका क्रममा जानकी मन्दिरका डोलासहित मन्दिरका महन्थ र पुजारीहरुले राम मन्दिरका डोलालाई विशेष पूजा गरे। पूजापछि रामको डोलालाई जानकीको डोलाले सातपटक परिक्रमा गरेको थियो।
स्वयंवरपछि जनकपुरका अधिकांश मन्दिरका झाँकीहरूसहित जनकपुरधाममा शोभायात्रा निकालियो। सो अवसरमा नेपाली सेनाको हेलिकप्टरले पुष्प वृष्टि गरिएको थियो। सीता–राम विवाह कार्यक्रम आज राति जानकी मन्दिरको प्राङ्गणमा सम्पन्न हुनेछ।