कांग्रेस अधिवेशन : प्रदेश २ मा मतदाता नामावली संकलन नहुँदा निर्वाचन तालिका प्रभावित

जनकपुरधाम- प्रदेश २ का आठवटै जिल्लाका मतदाता नामावली प्राप्त हुन नसकेकाले नेपाली कांग्रेस प्रदेश २ को अधिवेशन अन्तर्गत प्रतिनिधिहरुको नाम दर्ता कार्य स्थगित गरिएको छ। 

नेपाली कांग्रेस प्रदेश २ को अधिवेशन अन्तर्गत रजिष्ट्रेशन समितिले एक सूचना जारी गर्दै  प्राविधिक कारणले नाम दर्ताको कार्य स्थगित गरिएको जनाएको छ। नाम दर्ताको कार्य प्रभावित भएसँगै नेपाली कांग्रेस प्रदेश २को अधिवेशन समेत प्रभावित हुने देखिएको छ । 

प्रदेश २ को कांग्रेसको केही जिल्लामा वडा तथा क्षेत्रीय अधिवेशनहरुमा विवाद कायमै रहेकाले प्रदेश अधिवेशन प्रभावित हुने देखिएको छ। प्रदेश २को महोत्तरी, सर्लाही, बारा र पर्सा जिल्लाको मतदाता नामावली आउन नसकेको रजिष्ट्रेशन संयोजक विशेश्वर यादवले जानकारी दिए। 

'नेपाली कांग्रेस प्रदेश २को अधिवेशनका लागि अहिलेसम्म निर्वाचन तालिका समेत सार्वजनिक हुन सकेको छैन,'उनले थपे। निर्वाचन तालिका केन्द्रबाटै पठाइने र सोही अनुरुप निर्वाचन कार्यक्रम अगाडी बढाइने निर्वाचन समितिका एक सदस्यले जानकारी दिए।