जनकपुरधाम– नेपाली कांग्रेस प्रदेश २ का उपसभापतिमा प्रफुल्ल घिमिरेले उम्मेदवारी दिने घोषणा गरेका छन्। बिहीबार पत्रकार सम्मेलन आयोजना गर्दै घिमिरेले उपसभापतिमा उम्मेदवारी दिने घोषणा गरेका हुन्। उनले विमलेन्द्र निधिको समूहबाट उपसभापतिमा उम्मेदवारी दिने बताए।
घिमिरे २०३५ सालदेखि नेपाल विद्यार्थी संघबाट राजनीति शुरु गरेर निरन्तर नेपाली कांग्रेसमा रहेर राजनीति गर्दै आइरहेका छन्। उनले पछिलो ४३ वर्षदेखि राजनीतिमा लागेकोमा पटक पटक जेल यातना भोगेको बताए। उनी रारा बहुमुखी क्याम्पस जनकपुरको स्ववियु उपसभापति, तत्कालिन जिल्ला विकासको इलाका नं. १३ संयोजक, नेपाली कांग्रेस जनकपुर नगरसमितिको सदस्य र सचिव भएका हुन् भने तरुण दलको जिल्ला अध्यक्ष र केन्द्रीय सदस्य भएर पनि काम गरिसकेका छन्।
नेपाली कांग्रेसको नयाँ संरचनामा पहिलो पटक उम्मेदवारी दिन लागेका घिमिरेले संगठनभित्रको विकृति विसंगतिहरुलाई हटाउन र नेपाली कांग्रेसलाई समावेशिताको सिद्धान्तको आधारमा विधिविधानमा मात्र सीमित नगरेर व्यवहारमा लागु गराउन अहम् भूमिका निर्वाह गर्ने बताए।
नेपाल पत्रकार महासंघ धनुषाका सदस्यसमेत रहेका घिमिरेले आफ्नो उम्मेदवारी हरेक समुदाय, धर्म, जात, भाषाभाषीलाई समानताको आधारमा नेपाली कांग्रेसको नेतृत्व तहमा संगठनका पदाधिकारी, कार्यसमितिमा कसरी लग्ने त्यो अभियानमा लाग्ने बताए।