जनकपुरधामका आन्दोलनरत वडाध्यक्षहरु काठमाडौंमा, नगर प्रमुखको कार्यकक्षको ताला फुटाइयो

जनकपुरधाम- जनकपुरधाम उपमहानगरपालिकाका नगर प्रमुखको कार्यकक्षमा लगाइएको ताला आन्दोलरत वडाध्यक्षहरू काठमाडौं पुगेको मौका छोपेर नगरप्रमुख लालकिशोर साहले फुटाउन लगाएका छन्। 

सरसफाई व्यवस्थापनको माग गर्दै आन्दोलनमा रहेका वडाध्यक्षमाथि सरसफाई कर्मचारीले दुर्व्यवहार गरेपछि असन्तुष्ट वडाध्यक्षहरूले नगरप्रमुख साहको कार्यकक्षमा ताला लगाएका थिए। 

जनकपुरधाम उपमहानगरपालिका वडा नं. ५, १६, १७, १४, १८,२४,११ सहितका वडाअध्यक्षहरुलाई लगाएर नगरप्रमुख साहले आफ्नो कार्यकक्षमा लगाइएको ताला फुटाएका हुन्। 

सफाई कर्मचारी तथा जनकपुरधाम उपमहानगरपालिका वडा नं. ७का वडा सदस्य पंकज मण्डलसँग भएको विवादका कारण सोही वडाका वडाध्यक्ष सुदर्शन सिंह, वडा ७का वडाध्यक्ष जानकीराम साह, वडा ३का वडाध्यक्ष दीपेन्द्र साहले नगर  प्रमुख साहको कार्यकक्षमा ताला लगाएका थिए।

ताला लगाएको ६ दिनसम्म नगरपालिकाको कार्यालयसम्म नपुगेका नगर प्रमुख साह वडाध्यक्षहरु सामान्य प्रशासन मन्त्रालय काठमाडौंमा ज्ञापन पत्र बुझाउनका लागि पुगेको मौका छोपेर ताला फुटाउन लगाएका हुन्। 

ताला फुटाएलगत्तै वडाध्यक्षविरुद्ध आन्दोलनरत कर्मचारीहरु आन्दोलन छोडेर काममा फर्किएका हुन्। ताला तोडेपछि मेयर साहले रामजानकी विवाहपञ्‍चमीलाई मध्यनजर गरी कर्मचारीहरुलाई कार्यमा फर्किन निर्देशन दिएपछि औपचारिक रूपमा सोमबारदेखि कामलाई निरन्तरता दिने कर्मचारीहरुले बताए। 

कर्मचारी एशोसिएशनका अध्यक्ष शरद लाभले हाम्रो आन्दोलन जारी नै रहेको बताउँदै रामजानकी विवाह महोत्सवमा देशविदेशबाट पहुनाहरु आउने भएकाले त्यसलाई ध्यानमा राखेर आफूहरु काममा फर्किएको  बताए। 

उता नगरप्रमुख साहको राजीनामा माग गर्दै काठमाडौंको माइतीघरमा आन्दोलनरत वडाध्यक्षहरूले घण्टौंसम्म विरोध प्रदर्शन गरेका छन्।

शनिबार जनकपुरधामबाट हिँडेका वडाध्यक्षहरूले विरोध प्रदर्शनका साथै सामान्य प्रशासन मन्त्रालयमा उपमहानगरपालिकाको दुरावास्थाबारे जानकारी गराउँदै हर-हिसाब पारदर्शी र फोहर व्यवस्थापन सहित माग गर्दै ज्ञापन पत्र बुझाएका छन्। सोमबार प्रधानमन्त्रीको कार्यालयलगायतका सम्बन्धित निकायमा ज्ञापनपत्र बुझाउने जनकपुरधाम उपमहागरपालिका वडा नम्बर ७का वडाध्यक्ष जानकीराम साहले जानकारी दिए।