नारायणी अस्पतालको इमर्जेन्सी शाखामा विधार्थीहरुद्वारा तोडफोड

पर्सा-  कोरोना भाइरसविरुद्धको खोप लगाउन गएका विद्यार्थीहरुले वीरगन्‍जस्थित नारायणी अस्पतालको इमर्जेन्सी शाखामा तोडफोड गरेका छन्। नारायणी अस्पतालमा बिहीबार कोरोनाविरुद्धको खोप लगाउन गएका वीरगन्जका अधिकांश विद्यालयका कक्षा ९ र १० मा अध्ययनरत विद्यार्थीहरुले अस्पतालको इमर्जेन्सी शाखामा तोडफोड गरेका हुन्।

भ्याक्सिन दिन रोक लगाइएपछि विधार्थीहरु आक्रोशित भई ढुंगा हानी तोडफोड गरेको हो। विधार्थीहरुले चलाएको ढुंगामुडाले इमर्जेन्सी शाखाको सिसामा क्षति पुगेको छ। आक्रोशित विधार्थीहरुलाई नियन्त्रण गर्न प्रहरी समेत परिचालन गरेको छ। 

नारायणी अस्पतालका निमित्त प्रमुख डा. बिरेन्द्रबहादुर प्रधानले भिडभाड बढेपछि तत्काल भ्यकसिन दिन रोक लगाउँदा विधार्थीहरुले ढुंगामुडा गरेको प्रतिक्रिया दिएका छन्। 

विधार्थीहरुले कोभिडको स्वास्थ्य मापदण्ड मास्क, समाजिक दूरीलगायतका स्वास्थ्य मापदण्ड पूरा नगर्दा एक्कासी भिडभाड भएपछि स्वास्थ्य मापदण्ड पालना गराउन तत्काल भ्याक्सिन दिन रोक लगाएको बताए। 

प्रहरी र विद्यालयका शिक्षकहरुको सहयोगमा भिड नियन्त्रण गरी खोप लगाई संचालन गर्ने उनले बताए।