जीपको ठक्करबाट सल्यानमा दुई विद्यार्थीको मृत्यु

सुर्खेत– सल्यानमा जीपको ठक्करबाट दुई जना विद्यार्थीको मृत्यु भएको छ। मृत्यु हुनेमा शारदा नगरपालिका–६ बरलाकी १८ वर्षीया रेखा बुढाथोकी र १८ वर्षीया सुनिता नेपाली छन्।

दुबै जना शिवजन माध्यमिक विद्यालय शितलपाटीमा अध्ययनरत छात्राहरु हुन्। जीपको ठक्करबाट गम्भीर घाइते भएका उनीहरुको उपचारका क्रममा राप्ती प्रादेशिक अस्पताल तुलसीपुरमा मृत्यु भएको सल्यान प्रहरीले जनाएको छ।

दुर्घटनामा सोही विद्यालयका अन्दाजी १८ वर्षीया मिना परियार, १६ वर्षीया सुशीला नेपाली र १८ वर्षीया दिपा बुढाथोकी गम्भीर घाइते भएका छन्। उनीहरुलाई थप उपचारको लागि नेपालगन्ज रिफर गरिएको छ। सल्यान प्रहरी कार्यालयका सूचना अधिकारी अर्जुन पौडेलका अनुसार आज शुक्रबार बिहान दश बजेतिर विद्यालय जाँदै गरेका छात्राहरुलाई जीपले ठक्कर दिएको थियो।

बागचौरदेखि खलंगा जाँदै गरेको लु २ च ५७०१ नम्बरको जीपले शारदा नगरपालिका–२ बाङ्गेसल्लामा विश्राम गरिरहेका विद्यार्थीलाई ठक्कर दिएको थियो। विद्यार्थीलाई ठक्कर दिएको जीप सडकबाट १० मिटर तल खसेको छ। चालक र जीपलाई प्रहरीले नियन्त्रणमा लिएको छ। यसैबीच स्थानीयले दोषीलाई कारबाही  र क्षतिपूर्तिको माग गर्दै राप्ती राजमार्ग अवरुद्ध गराएका छन्।