तातोपानीमा राष्ट्रव्यापी महिला भलिबल

काठमाडौं- भोटेकोशी गाउँपालिकाको आयोजनामा 'भोटेकोशी गाउँपालिका अध्यक्ष कप राष्ट्रव्यापी महिला भलिबल प्रतियोगिता' हुने भएको छ। वैशाख ८ गतेदेखि सुरु हुने प्रतियोगिता वैसाख ११ सम्म सञ्चालन हुने जानकारी आयोजकले दिएको छ।

प्रतियोगितामा नेपाल आर्मी क्लब, नेपाल प्रहरी क्लब, नेपाल एपीएफ क्लब, न्यु डायमन्ड क्लब, ढोरपाटन प्रशिक्षण केन्द्र, बालाजु र सिन्धुपाल्चोक भलिबल संघ गरी ६ टिम सहभागी हुने प्रतियोगिता व्यवस्थापन मूल समितिका संयोजक कुमार श्रेष्ठले बिहीबार पत्रकार सम्मेलन आयोजना गरी जानकारी दिएका हुन्।

प्रतियोगिताको विजेताले ३ लाख, उपविजेताले २ लाख, तेस्रोले १ लाख र चौथो हुने टिमले ५० हजार नगद पुरस्कार प्राप्त गर्नेछन्। सर्वोत्कृष्ट खेलाडीलाई २० हजार नगद प्रदान गरिनेछ।

विधागत उत्कृष्टतर्फ स्पाइकर, सर्भर, डिफेन्स, ब्लकर, सेटर र प्रशिक्षकलाई जनही ७ हजार नगदबाट पुरस्कृत गरिने छ। प्रत्येक खेलको ‘प्लेयर अफ म्याच’ लाई २ हजार नगद पुरस्कार दिइने छ।

प्रतियोगिताका खेलहरु भोटेकोशी गाउँपालिका-२ स्थित तातोपानी आधारभूत विद्यालयमा खेलाइने छ।