चर्च बोइज, वीरगंज र सामाजिक फुटबल क्लब बी डिभिजनमा बढुवा

काठमाडौं- सी डिभिजनमा लिगविजेता बन्दै चर्च बोइज बी डिभिजन फुटबल लिगमा बढुवा भएको छ।

समूह चरणमा शीर्ष तीनमा रहँदै सुपर सिक्समा पुगेको चर्च बोइजले सोमबार भएको अन्तिम खेलमा झापा फुटबल क्लबलाई २–१ गोलले पराजित गर्दै लिग च्याम्पीयन बनेको हो।

सातदोबाटोस्थित एन्फा कम्प्लेक्समा भएको खेलबाट वीरगंज युनाइटेड र सामाजिक युवा क्लब पनि बी डिभिजनमा बढुवा भएका छन्।
वीरगंजले अन्तिम खेलमा खालीबारी युथ क्लबलाई ३–१ गोलले हरायो भने सामाजिक युवा क्लबले वीरगंज युथ एकेडेमीलाई १–० गोलले हरायो।

शीर्षस्थानको चर्च बोइजले ११ अंक जोड्दा दोस्रो स्थानको वीरगंजले अंक बनायो। तेस्रो र चौथो स्थानका वीरगंज युथ एकेडेमी र सामाजिक युवा क्लबको समान ७–७ अंक भए पनि हेड टू हेडका आधारमा अघि रहँदै सामाजिक युवा क्लब बढुवा भयो।

यससँगै बी डिभिजन लिगमा १४ क्लब भएका छन्। शीर्ष डिभिजनको फुटबल लिगमा पनि समान १४ क्लब छन्। गत वर्षको बी डिभिजनमा १२ क्लब मात्र सम्मिलित थिए।
त्यहाँबाट पुल्चोक सी डिभिजनमा घटुवा भएको थियो भने लिग विजेता बन्दै सातदोबाटो युथ क्लब ए डिभिजनमा उक्लिएको थियो।

गत वर्ष सम्पन्न ए डिभिजन लिगको पुछारमा रहँदै सरस्वती युथ क्लब बी डिभिजनमा घटुवा भइसकेको छ।
बाँकी क्लबहरु भने यथावत् छन्। सी डिभिजन लिगबाट सानोगौचरन रेलिगेसनमा परेको छ। उसले फेरि सी डिभिजन लिग खेल्न क्वालिफायर खेल्नुपर्ने छ।