बेस्ट ब्याटर रुविना, बेस्ट बलर बिनु र सर्वोत्कृष्ट खेलाडी सीता

काठमाडौं- शनिबार सम्पन्न ललितपुर मेयर टी-२० क्रिकेट महिला च्याम्पियनसिपमा प्रदेश १ की कप्तान रुविना क्षेत्री सर्वोत्कृष्ट ब्याट्सवुमन बनेकी छन्।

लिग चरणमा दुई जित र दुई हार व्यहोरेको प्रदेश १ की कप्तान क्षेत्रीले उत्कृष्ट प्रदर्शन गरेपनि उनको टिम फाइनलमा पुग्नबाट भने चुकेको थियो। क्षेत्रीले एक अर्धशतकसहित १६१ रन बनाएकी थिइन्।

त्यस्तै, बिनु बुढामगर उत्कृष्ट बलर बनेकी छन्। एपीएफकी बुढामगरले लिग चरणका चार खेलमा ९ विकेट गिराएकी थिइन्। उनको उत्कृष्ट प्रदर्शनमा एपीएफले उपाधि जितेको छ।

विजेता क्लब एपीएफकी कप्तान सिता राना मगर प्रतियोगिताको सर्वोत्कृष्ट खेलाडी बनेकी छन्। लिग चरणका चार खेलमा चार विकेट लिएकी उनले फाइनल खेलसमेत गरी प्रतियोगिताभर १२३ रन बनाएकी थिइन्। 

सर्वोत्कृष्ट बनेकी सीताले २५ हजार रुपैयाँ पाइन् भने बेस्ट बलर बिनु र बेस्ट ब्याटर रुविनाले समान १५-१५ हजार रुपैयाँ पुरस्कार प्राप्त गरेका छन्।