ललितपुर मेयर कपको फाइनलमा एपीएफलाई सुदूरपश्चिमको चुनौती

काठमाडौं– ललितपुर मेयर कप महिला टी–२० च्याम्पियनसिपअन्तर्गतको फाइनल खेल शनिबार हुँदै छ। 

ललितपुर महानगरपालिकाको २० लाख रुपैयाँ आर्थिक सहयोगमा आयोजित प्रतियोगिताको फाइनलमा विभागीय टिम एपीएफ र सुदूरपश्चिम प्रदेश भिड्दै छन्।

लिग अवधिका चारै खेलमा अपराजित यात्रा गरेको एपीएफ फाइनलमा सुदूरपश्चिमलाई हराउँदै यो वर्षको पहिलो उपाधि जित्ने दाउमा छ।

एपीएफले लमही मैदानमा भएको पीएम कपको फाइनलमा प्रदेश १ सँग हार बेहोरेपछि यो वर्ष उपाधि जितेको छैन। 

प्रधानमन्त्री कपको विजेता प्रदेश नम्बर एक भने दुई हार र दुई जितका साथ समूह चरणबाटै बाहिरहेको छ।

समूह चरणमा एकमात्र हार बेहोरेको सुदुरपश्चिम पनि विभागीय क्लबलाई हराउँदै उपाधि जित्ने दाउमा हुनेछ। तर तुलनात्मक रुपबा बलियो एपीएफसँग उसले लिग चरणको खेलमा भने हार बेहोरेको थियो।

त्यसैले लिग चरणमा बेहोरेको हारको बदला लिँदै सु्दूरपश्चिम उपाधि जित्न चाहन्छ। पीएम कपमा भने सुदूरपश्चिम लिग चरणबाटै बाहिरिएको थियो। फाइनल खेल आज दिउँसो १ बजेट हुनेछ।