मेयर कपमा प्रदेश १ को सुखद अन्त्य

काठामाडौं – एक खेल अगावै लिग चरणबाट बाहिरिएको प्रदेश १ ले ललितपुर मेयर कप महिला टी२० क्रिकेटमा सुखद अन्त्य गरेको छ।

कीर्तिपुरस्थित त्रिवि क्रिकेट मैदानमा सम्पन्न खेलमा प्रदेश १ ले ललितपुर मेयर ११ लाई १५ रनले हराएको हो।

टस जितेर ब्याटिङ राजेको प्रदेश १ ले रोमा थापाको ६६ रनको सहयोगमा दुई विकेट गुमाउँदै १२८ रन बनाएको थियो। 

जबाफी ब्याटिङमा मेयर ११ पूरा ओभर खेलेर सात विकेट गुमाउँदै ११३ रनमा समेटिएपछि खेल प्रदेश १ ले जित्यो।
प्रदेश १ का लागि कप्तान रुविना क्षेत्री र अप्सरी बेगमले क्रमशः २१ र २६ रन बनाए।

मेयर ११ का सन्तोषी चौधरी र सरस्वती कुमारीले समान १–१ विकेट गिराए।

मेयर ११ की अनुराधा चौधरीले २८ रन बनाइन् भने सुमन खतिवडाले २७ र सरस्वती कुमारीले १७ रन जोडिन्।

प्रदेश १ की रुविना क्षेत्रीले तीन विकेट लिँदा सबनम राई र ज्योति दनुवारले समान १–१ विकेट लिए।

यससँगै प्रदेश १ ले लिगमा दुई जित र दुई हार बेहोरेको छ। प्रदेश १ ले यसअघि एपीएफ र सुदुरपश्चिमसँग हार बेहोरेको थियो भने मेयर ११ र लुम्बिनीलाई हराएको थियो।

एकमात्र जित निकालेको मेयर ११ ले प्रतियोगिताको अन्तिम खेलमा हार बेहोरेको हो।
मेयर कपअन्तर्गत फाइनल आगामी शनिबार हुनेछ।