महिला भलिबल लिगको उपाधिको प्रतिस्पर्धामा पुलिस र न्यू-डाइमन्ड

काठमाडौं- सशस्त्र प्रहरीको विभागीय टिम एपिएफलाई हराउँदै न्यू डाइमन्ड क्लब पाचौँ एनभिए महिला तथा पुरुष भलिबल क्लब लिगको फाइनलमा पुगेको छ।

त्रिपुरेश्वरस्थित राखेपको कभर्डहलमा बुधबार सम्पन्न खेलमा ३–१ को सेटमा जित निकाल्दै न्यू डाइमन्ड फाइनल प्रवेश गरेको हो।

लिग चरणको अन्तिम खेलमा समान १० अंक भएका एपिएफ र न्यू डाइमन्डले प्रतिस्पर्धा गरेका थिए।एपिएफ पराजित भएपछि उसको फाइनल यात्रामा विराम लागेको हो।

लिग चरणमा आर्मीसँग मात्र ३–२ सेटमा पराजित न्यु डाइमन्डले पाँच खेलबाट १३ अंक बनाएको छ। न्यू डाइमन्डले एपिएफलाई २५–२१, २६–२४, १४–२५ र २५–२१ को सेटमा हराएको थियो।

त्यस्तै, बुधबार नै भएको पहिलो खेलमा त्रिभुवन आर्मीलाई हराउँदै नेपाल पुलिस क्लब फाइनल प्रवेश गरेको छ।

लिग चरणको अन्तिम खेलमा समान ८–८ अंक भएका आर्मी र पुलिसले खेलेकोमा पुलिसले सोझो सेटमा जित निकाल्दै ३ अंक जोडेर ११ अंक बनाएको हो।

११ अंक बनाएर अंकतालिकाको दोस्रो स्थानमा रहँदै उसले फाइनलमा स्थान बनाएको हो। लिग चरणको अन्तिम खेलमा पुलिसले २६–२४, २५–१७ र २८–२६ को संघर्षपूर्ण जित निकालेको थियो। महिलातर्फको फाइनल खेल बिहीबार हुनेछ।

पुरुषतर्फ हेल्प नेपाल समूह फाइनल प्रवेश गरिसकेको छ। त्यस्तै फाइनल पुग्ने दोस्रो टिमको टुंगो बुधबार हुने खेलबाट टुंगो लाग्नेछ। पुरुषतर्फ बुधबार तीन खेल हुँदैछन्।