ललितपुर मेयर कपको फाइनलमा एपीएफसँग सुदूरपश्चिम भिड्ने

काठमाडौं– जारी ललितपुर मेयर महिला टी–२० क्रिकेट च्याम्पियनसिपमा तेस्रो जित निकाल्दै सुदूरपश्चिम प्रदेशले फाइनलमा विभागीय टिम एपीएफसँग भेट पक्का गरेको छ।

कीर्तिपुरस्थित त्रिभुवन विश्वविद्यालयको मैदानमा बुधबार दिउँसो सम्पन्न खेलमा लुम्बिनी प्रदेशलाई आठ विकेटले हराउँदै सुदूरपश्चिम फाइनल प्रवेश गरेको हो।

टस जितेर ब्याटिङ रोजेको लुम्बिनीले निर्धारित पुरा ओभर खेल्दै ९ विकेटको क्षतिमा ७१ रन जोडेको थियो। ७२ रनको लक्ष्यका साथ मैदान उत्रिएको सुदूरपश्चिमले ४५ बल बाँकी रहँदै दुई विकेट गुमाएर लक्ष्य पुरा गर्‍यो।

सुदूरपश्चिमका लागि मन्जु बोगटीले सर्वाधिक २६ रन जोडिन् भने रेवती धामी र विन्दु रावलले समान १७–१७ रनको योगदान दिए। लुम्बीनी प्रदेशकी कृतिका मरासिनीले दुई विकेट लिइन्।

त्यसअघि ब्याटिङमा आएको लुम्बनीकी लक्ष्मी चौधरीले २६ रन बनाइन्। कप्तान नेरी थापाले ११ रन बनाउनुबाहेक अन्य खेलाडीले दोहोरो अंकमा रन बनाउन सकेनन्।

यता सुदूरपश्चिमकी लक्ष्मी साउदले चार विकेट गिराइन् भने रितु कनौजियाले तीन विकेट लिइन्। एक विकेट लिनेमा सुनिता लोहार र कविता जोशी रहे।

प्रतियोगितामा एपीएपले लगातार तीन जित निकाल्दै एक खेल अगावै फाइनल प्रवेश गरिसकेको छ।
फाइनल खेल आगामी चैत २८ गते शनिबार त्रिवि मैदानमा हुनेछ। प्रतियोगितामा भोलि (बिहीबार) दुई खेल हुनेछ भने शुक्रबार रेस्ट डे छ।