भलिबल लिगमा आज निर्णायक खेल हुँदै

काठमाडौं– पाँचौ संस्करणको एनभीए पुरुष महिला क्लब भलिबल लिग अन्तर्गत आज निर्णायक खेल हुँदैछन्।

महिलातर्फ आज दुई खेल हुँदैछन्। आजका खेलमा समान ८–८ अंक भएका नेपाल पुलिस क्लब र त्रिभुवन आर्मी क्लबसँग प्रतिस्पर्धा गर्नेछ।

महिलातर्फ त्यसअघि हुने खेलमा समान १०–१० अंक भएका न्यु डायमण्ड क्लबले विभागीय क्लब एपीएफको सामना गर्नेछ। यी दुई क्लबमध्ये जित निकाल्ने टिम फाइनल पुग्नेछ।

तर फाइनल पुग्ने अर्को टिमको टुंगो पुलिस र आर्मीबीचको खेलले लाग्नेछ। यो खेलमा कुनै टिमले तीन अंक प्राप्त गर्न सकेमा ऊ फाइनलमा प्रवेश गर्नेछ। यदि जित्ने टिमले दुई अंक मात्र बनाउन सके फाइनल पुग्ने टिमको टुंगो खेलको स्कोरबाट लाग्नेछ।

यता पुरुषतर्फ लगातार पाँच जित निकालेको हेल्प नेपाल स्पोर्टस् क्लब फाइनलमा प्रवेश गरेको छ। तर फाइनल पुग्ने अर्को टिमको भने टुंगो लागेको छैन।

आज लिग चरणको अन्तिम दिन पुरुषतर्फका तीन खेल हुँदैछन्। ती खेलबाट फाइनलमा पुग्ने अर्को टिमको टुंगो लाग्नेछ।

लिग चरणको अंक तालिकाको पहिलो र दोस्रो स्थानमा रहने टिमले फाइनल खेल्न पाउनेछन्। महिला र पुरुष दुवैतर्फको फाइनल खेल भोलि(बिहीबार) त्रिपुरेश्वरस्थित राष्ट्रिय खेलकुद परिषद्(राखेप) को कभर्डहलमा हुनेछ।