रियल मड्रिड च्याम्पियन्स लिगको सेमिफाइनल नजिक

काठमाडौं– युईएफए च्याम्पियन्स लिगअन्तर्गत क्वार्टरफाइनलको पहिलो लेगको खेलमा स्पेनिस क्लब रियल मड्रिडले इंग्लिस क्लब लिभरपुललाई ३–१ गोलले हराएको छ।

रियलको अल्फ्रेदो स्टेफानो रंगशालामा भएको पहिलो लेगको खेलमा जित निकाल्दै घरेलु टिम सेमिफाइनल नजिक पुगेको हो।

गएराति रियलको जितका लागि भिनियसियस जुनियरले दोहोरो गोल गरे भने एसेन्सियोले एक गोल थपे। त्यसबीच लिभरपुलका मोहम्मद सलाहले पनि एक गोल गरे।

खेलको २७ औं मिनेटमा टोनी क्रुसले दिएको पासलाई उपयोग गर्दै भिनिसियसले अग्रता बनाएका थिए। पहिलो हाफकै ३६ मिनेटमा एसेन्सियोले गोल गरेपछि रियलले दुई गोलको अग्रता बनायो।

दोस्रो हाफको ५१ औं मिनेटमा लिभरपुलका सलाहले गोल गरे पनि  खेलमा पुनरागमन गर्न सकेन। बरु रियलकै भिनिसियस जुनियरले लुका मोड्रिचको पासमा अर्को गोल थप्दै नतिजालाई ३–१ गोलअन्तरमा पुर्याएका थिए।

घरेलु मैदानमा पहिलो लेगको जितसँगै रियल सेमिफाइनल नजिक छ। अब दोस्रो लेगको खेल अप्रिल १५ मा एनफिल्डमा हुँदैछ।