मुख्य प्रशिक्षकबाट बालगोपालको बिदाइ, एन्फाले नयाँ प्रशिक्षक ल्याउने

काठमाडौं- अखिल नेपाल फुटबल संघ (एन्फा) ले नयाँ प्रशिक्षक अनुबन्ध गर्ने भएको छ।

पहिलेका प्रशिक्षक योहान कालिनले कोरोनाको माहामारीका कारण नेपाल आउन नसकेपछि राजीनामा दिएका थिए।

महामारीमा एन्फाले तत्कालै नयाँ प्रशिक्षक अनुबन्धको प्रकृया थाले पनि बालगोपाल महर्जनलाई कार्यकारी प्रशिक्षकको जिम्मेवारी दिएको थियो।

तर उनीसँग राष्ट्रिय टिमको हेड कोच हुनका लागि आवश्यक फिफा प्रो लाइसेन्स नभएकाले नयाँ प्रशिक्षक आउन लाग्ने समयसम्मका लागि राष्ट्रिय टोली सम्हालिरहेका थिए।

उनको पछिल्लो कार्यकालमा नेपालले थ्री नेसन्स कप जितेकोे थियो भने बंगलादेशमा सम्पन्न दुई देशीय मैत्रीपूर्ण खेलमा हार बेहोरेको थियो।
यसअघि पनि प्रशिक्षक भएका बालगोपालले नेपालले बंगबन्धु कपमा नेपाललाई स्वर्ण जिताएका थिए।

एन्फाले उनलाई घरेलु मैदानमा हुने फिफा विश्वकप छनोटको खेलसम्मका लागि नियुक्त गरेको भए पनि विश्वकप छनोट खेलको ठाउँ र मिति परिवर्तन भएपछि एन्फाले छनोटअघि नै नयाँ प्रशिक्षक नियुक्त गर्न लागेको हो।