सर्जियो अग्युरोले म्यानचेस्टर सिटी छोड्ने

काठमाडौं – २०२१ को जुन अन्तिममा सम्झौता समाम्त भएसँगै म्यानचेस्टर सिटीका फरवार्ड सर्जियो अग्युरोले प्रिमियर क्लब छोड्ने बताएका छन्।

इतिहाद रंगशालामा अर्जेन्टिनी फरवार्डको भविष्यबारे चर्चाहरू बाहिरिरहेको समयमा उनले आउँदो विन्डोमा क्लब छोड्ने बताएका हुन्।

उनले सिटीकातर्फबाट जारी सिजनमा ६ खेलमा मात्र सहभागिता जनाएका थिए। २०११ को सिजनमा सिटीको पहिलो रोजाईमा रहँदै क्लबमा अनुबन्ध भएका अग्युरोले रोबर्टो मान्सिनी, म्यानुएल पेलेग्रिनी र पेप ग्वार्डिओलाको प्रशिक्षणमा खेलिसकेका छन्।

यदि उनले यो समरमा क्लब छोडे सर्वाधिक गोलकर्ताका रुपमा क्लब छोड्नेछन्। उनले ३ सय ८४ खेलमा २ सय ५७ गोल गरिसकेका छन्।

उनले १० सिजनका ३ सय ८४ खेलबाट १३ उपाधि जितिसकेका छन्। उनले जितेकोमा चार प्रिमियर लिग, पाँच लिग कप, एक एफए कप र तीन कम्युनिटि शिल्ड जितेका थिए।

‘उपाधि जित्नका लागि म बाँकि सिजनमा पुरा इफोर्टका साथ खेल्नेछु,’ अग्युरोले सुामाजिक सञ्जाल ट्विटरमा भनेका छन्, ‘त्यसपछि अर्को नयाँ स्टेजमा नयाँ चुनौतिको सामाना गर्न तयार छु। नयाँ ठाउँमा पनि पुरा शक्तिका साथ काम गर्नेछु।’