विश्वकप छनोटमा जर्मनीको साँघुरो जित

काठमाडौं – फिफा विश्वकप २०२२ को युरोपेली छनोटअन्तर्गत आइतबार राति सम्पन्न खेलमा जर्मनीले रोमानियाविरुद्ध १–० गोलको जित निकालेको छ।

रोमानियाको राजधानी बुखरेस्टमा सम्पन्न खेलमा सर्ज गन्याब्रीले गोल गरेपछि जर्मनीले जित निकालेको हो।

खेलको १६ औं मिनेटमा जर्मनीका अट्याकिङ् मिडफिल्डर केइ मभाट्र्जले उपलब्ध गराएको पासलाई गन्याब्रीले रोमानियाको पोस्टको दिशा दिए।

यो जितसँगै थप तीन अंक जोडेर ६ अंक बनाएको जर्मनी समूह जे को शीर्षस्थानमा छ। समान ६ अंक भएको अर्मेनिया गोलअन्तरमा पछि पर्दै दोस्रो स्थानमा छ।

अर्मेनियाले गएरातिको खेलमा आइसल्यान्डलाई २-० गोलले हराएको थियो। 

त्यस्तै समूह जे को तेस्रो स्थानमा रहेको नर्थ म्याकडोनियाले लेक्चिन्स्टाइनलाई ५-० गोलले हराएको छ।

म्याकडोनियाले दुई खेलबाट तीन अंक बनाएको छ। 

समूहको चौथो स्थानमा रहेको रोमानियाको पनि तीन अंक छ। 

पाँचौ र छैटौं स्थानका आइसल्यान्ड र लेक्चिन्स्टाइन अंकविहीन छन्।