बराबरीमा रोकियो आर्मी र कीर्गिस्तानको खेल

काठमाडौं– त्रिभुवन आर्मी फुटबल क्लब कीर्गिस्तानको राष्ट्रिय ओलम्पिक टिमसँग गोलरहित बराबरीमा रोकिएको छ।

त्रिपुरेश्वरस्थित दशरथ रंगशालामा आज सम्पन्न मैत्रीपूर्ण खेलमा आर्मी क्लब बराबरीमा रोकिएको हो। एएफसी कपको तयारीस्वरुप खेलिएको मैत्रीपूर्ण खेल बराबर भयो।

आर्मीले आउँदो अप्रिल ७ मा दशरथ रंगशालामै श्रीलंकाको पुलिस टिमसँग खेल्दैछ। त्यही खेलको तयारीस्वरुप आज मैत्रीपूर्ण खेल भएको हो।
खेलको २६ औं मिनेटमा कीर्गिस्तानका मिडफिल्डर अबिलभ अर्नेजले गरेको प्रहार पोस्टमा ठोकिएर बाहिरिएपछि कीर्गिस्तानले सुनौलो अवसर गुमाएको थियो।

त्यसअघि आर्मीले डिबक्स छेवैबाट पाएको फ्री किकको अवसर गुमाएको थियो। पहिलो हाफको इन्ज्युरी समयमा दुवै टिमले आक्रामक मुभ बनाए पनि गोलले पोस्टको गति लिन सकेन।

दोस्रो हाफको ४८ औं मिनेटमा आर्मीका विवेक बस्नेतको प्रहार पोस्टको नजिकैबाट बाहिरिएको थियो।

आर्मीका तर्फबाट ३५ औं मिनेटमा सुमन अर्यालको ठाउँमा टेक बहादुर बुढाथोकी प्रवेश गरे पनि उनी घाइते भएर मैदान छोडेका थिए। उनको ठाउँ ५७ औं मिनेटमा सुदिलले लिएका थिए।

आर्मीले अन्य धेरै परिवर्तन गरे पनि स्कोरिङ हुन नसक्दा खेल बराबरीमै रोकियो।

यससँगै दशरथ रंगशालामा भएका पछिल्ला तीन खेल नै गोलरहित बराबरीमा रोकिएका छन।