सप्तरी प्रिमियर लिगको उपाधि खडक वारियर्सलाई

काठमाडौं- खडक वारियर्सले रुपनी राईडर्सलाई १ रनले पराजित गर्दै तेस्रो संस्करणको सप्तरी प्रिमियर लिगको उपाधि जितेको छ।

राज रंगशालामा आज सम्पन्न फाइनल खेलमा खडक वारियर्सले दिएको १४७ रनको लक्ष्य पछ्याउने क्रममा रुपनी राईडर्सले निर्धारित २० ओभरमा ९ विकेट गुमाउँदै १४५ रन बनाउन सक्यो।

रुपनीको लागि निरज मुखियाले अविजित ५२ रन बनाए भने सुनिल धमलाले २३, अमित यादवले १९ तथा कुशल भुर्तेलले १५ रन बनाए।

खडकको बलिङमा अनिल खरेल र गोमानंद अमात्यले समान ३ विकेट लिए। खरेलले ४ ओभरमा १ मेडन ओभर गर्दै १० रन तथा अमात्यले ४ ओभरमा १८ रन खर्चिए। भुलावन सहानीले २ विकेट तथा पवन सर्राफले १ विकेट लिए।

यसअघि टस जितेर ब्याटिङ रोजेको खडकले निर्धारित २० ओभरमा ६ विकेट क्षतिमा १४६ रन बनाएको थियो।
खडकको लागि ओपनर निरज यादवले सर्वाधिक ५१ रन बनाए। यस क्रममा उनले ५० बलमा ४ चौका र १ छक्का प्रहार गरे।

अर्का ओपनर अनिल शाहले २९ रन, कप्तान विवेक यादवले २२ रन तथा भुलावन सहानीले अविजित १३ रन बनाए।
पहिलो विकेटको लागि अनिल र निरजले ५८ रनको साझेदारी गरेका थिए।

रुपनी राईडर्सको बलिङमा दायाँ हाते फास्ट बलर अनिल यादवले सर्वाधिक ३ विकेट लिए जुन क्रममा ४ ओभरमा ३४ रन खर्चिए। सुनिल धमला र कुशल भुर्तेलले समान १ विकेट लिए।

उपाधिसहित बजाज खडक वारियर्सले ३ लाख रुपैयाँ हात पार्यो। यस्तै रुपनी राईडर्सले १ लाख ५० हजार रुपैयाँ प्राप्त गर्यो।

प्रतियोगिताकै उत्कृष्ट खेलाडी बजाज खडक वारियर्सका अनिल कुमार शाह चुनिए जसले २५ हजार रुपैयाँ प्राप्त गरे। प्रतियोगितामा अनिलले २ वटा शतक र एउटा अर्धशतक प्रहार गर्दै ५ खेलमा कुल ३३४ रन बनाए।

प्रतियोगिताकै उत्कृष्ट बलर विशाल सुस्लिङ र उत्कृष्ट ब्याट्सम्यान अनिल शाह चुनिए जसले रु. १५ हजार प्राप्त गरे। विशालले प्रतियोगितामा ४ खेलमा ९ विकेट लिए।