धरान एकेडेमी मिल्स गोल्डकपको सेमिफाइनलमा 

विराटनगर– विराटनगरमा जारी पहिलो मिल्स गोल्डकप प्रतियोगितामा धरान सिटी फुटबल एकेडेमी सुनसरी सेमिफाइनलमा प्रवेश गरेको छ। 

विराटनगर– १६ स्थित जुट मिल्सको खेलमैदानमा मंगलबार भएको अन्तिम क्वार्टरफाइनल खेलमा शताक्षीधाम स्पोर्टस क्लब झापालाई १–० गोलले पराजित गरि धरान सेमिफाइनलमा प्रवेश गरेको हो।

जितसँगै धरान बिहीबार हुने दोस्रो सेमिफाइनल खेलमा साइनो स्पोर्टस क्लब रानीबीच हुनेछ। अन्तिम चारमा पुगेको धरानले जितको लागि एक मात्र निर्णायक गोल खेल सुरू भएको ४ मिनेटमै गरेको थियो। धरानका तपन कार्कीले गरेको गोल निर्णायक बन्यो। खेलको म्यान अफ द म्याच झापाका गोलरक्षक सन्दिप लिम्बू घोषित भए। उनले नगद पाँच हजार रुपैयाँ प्राप्त गरे। 

मिल्स गोल्डकप फुटबल ट्रष्टको आयोजनामा भएको प्रतियोगिताको विजेता नगद १ लाख ५० हजार रुपैयाँको साथै ट्रफि र उपविजेताले नगद ७५ हजार रुपैयाँ प्राप्त गर्ने छ।