मिल्स गोल्डकप : साइनो स्पोर्ट्स सेमिफाइनलमा प्रवेश 

विराटनगर- विराटनगरमा जारी प्रथम मिल्स गोल्डकप प्रतियोगितामा साइनो स्पोर्ट्स क्लब रानी, मोरङ सेमिफाइनलमा प्रवेश गरेको छ। 

विराटनगर जुट मिल्सको खेलमैदानमा आइतबार भएको प्रतियोगितामा साइनोले गाईघाट फुटबल क्लब उदयपुरलाई ३–१ गोलले पराजित गर्‍यो। साइनोले खेल सुरु भएको ८ औं मिनेटमा गिलसन कन्दङबाको गोलबाट खाता खोलेको थियो।

साइनोका गिलसनले १५ औँ मिनेटमा दोस्रो गोल गरी टिमलाई २–० गोलको अग्रता दिलाए। सुशन तामाङले निकालिदिएको पास गिलसनले वान भर्सेस वानको प्रहार जाली चुम्यो।

साइनोले दोस्रो गोल गरेको तीन मिनेट बित्न नपाउँदै खेलको १८ औं मिनेटमा गाइघाटका रविशंकर चौधरीले डिवक्स भित्रदेखि गरेको प्रहार गोलमा परिणत भयो। पहिलो हाफसम्म २–१ गोलले साइनकोले अग्रता कायम गर्‍यो।

साइनोका जीवन धामीले खेलको ८० औं मिनेटमा गोलगर्दै जित सुनिश्चित गरे। खेलको म्यान अफ दी म्याच कन्दङबा घोषित भए। उनले नगद ५ हजार रुपैयाँ प्राप्त गरे। 

सोमबारको खेल १ नम्बर प्रदेश प्रहरी कार्यालय रानी विराटनगर र एलेभेन एरोज क्बल दुहबी सुनसरीबीच प्रतिस्पर्धा हुने आयोजकले बताएको छ। 

प्रतियोगिताको विजेताले नगद १ लाख ५० हजार र उपविजेताले नगद ७५ हजार हात पार्ने छन्।