माघदेखि रिक्त क्रिकेट टिम प्रशिक्षकको अन्तर्वार्ता तत्काल हुने

काठमाडौं– नेपाल क्रिकेट संघ (क्यान)को आज (बिहीबार) सम्पन्न भर्चुअल बैठकले राष्ट्रिय क्रिकेट टिमको प्रमुख प्रशिक्षकको अन्तर्वार्ता तत्काल गराउने निर्णय गरेको छ। संघले सूचना जारी गर्दै गत माघदेखि रिक्त रहेको पदका लागि अन्तर्वार्ताको थालनी गरेको हो।

राष्ट्रिय क्रिकेट टोलीको प्रशिक्षण आउँदो मंसिर १० गतेबाट सुरु हुने भएपछि त्यसको तयारीस्वरुप अन्तर्वार्ता हुने भएको हो।

त्यस्तै बैठकले आगामी मंसिर तीन गते हुने वार्षिक साधारणसभाका लागि एजेण्डा तय गरेको सूचनामा बताएको छ। ‘वार्षिक लेखा परीक्षण, २०२१ को बजेट तथा कार्यक्रम, राणनीति योजना निर्माण, जिल्ला तथा प्रदेशिक संघहरुको कार्यविधि निर्माण, संघ पदाधिकारी एवम् कर्मचारीहरुको कोड अफ कन्डक्ट निर्माण, एन्टी करप्सन, एन्टी डोपिङ र इथिक्स पोलिसी निर्माण आदि वार्षिक साधारण सभाका लागि एजेण्डा तय गरिएको छ,’ सूचनामा भनिएको छ।

बैठकमा आर्थिक नियमावालीबारे छलफल भएको छ भने नेपाल अम्पायर तथा स्कोरर संघले प्रस्ताव गरेको विधानलाई संघले मान्यता प्रदान गरेको छ।

त्यस्तै, प्रस्तावित नेपाल प्रिमियर लिग(एनपीएल)लाई पनि क्यानले साधारण सभाको एजेण्डाको रुपमा रहेको बताएको छ।