तीन वर्षअघि नेपाल भित्रिएको जोमासार स्पोर्ट्स क्लबको उद्घाटन

काठमाडौं-  कीर्तिपुर–२, ट्याङ्लाफाँटमा नेपाल जोमासार स्पोर्ट्स क्लब सञ्चालनमा आएको छ। 

नेपालमा जोमासार मार्सल आर्ट्सको विकास र विस्तार गर्ने उद्देश्यसहित स्पोर्ट्स क्लबको शुभारम्भ गरिएको हो।

स्पोर्ट्स क्लबको बिहीबार राष्ट्रिय युवा संघ रामेछाप जिल्ला सचिव मुकुन्द गौतम र क्लबका अध्यक्ष एवं प्रमुख प्रशिक्षक राम विष्टले संयुक्त रुपमा उद्घाटन गरे।

तीन वर्षअघि नेपाल भित्रिएको जोमासार मार्सल आर्ट्सको २०७६ माघदेखि भने नियमित प्रशिक्षण हुँदै आएको छ।

यस मार्सल आर्ट्सको काठमाडौंको बल्खु, सानेपा र कालीमाटीमा यसअघि नै डोजो सञ्चालनमा रहेको प्रशिक्षक विष्टले जानकारी दिए।

क्लब उद्घाटनकै अवसरमा हालै भारतमा आयोजना भएको अनलाइन मार्सल आर्ट्स च्याम्पियनसिपका पदक विजेता खेलाडीलाई प्रमाणपत्र वितरण गरिएको थियो।

उक्त च्याम्पियनसिपमा नेपालले नौ स्वर्ण, दुई रजत र तीन कांस्य पदक जितेको थियो।