जोटाको ह्याट्रिकसँगै एटलान्टाको पोस्टमा लिभरपुलको ५ गोल

काठमाडौं– इंग्लिस क्लब लिभरपुलले च्याम्पियन्स लिगमा इटालियन क्लब एटलान्टाविरुद्ध सानदार जित निकालेको छ। 

एटलान्टाको घरेलु मैदानमा सम्पन्न खेलमा लिभरपुलले ५–० गोलको जित निकालेको हो।

लिभरपुलका लागि डियागो जोटाले ह्याट्रिक गरे। खेलको १६ औं मिनेटमा गोल गर्दै उनले लिभरपुललाई सुरुवाती अग्रता दिलाए।

पहिलो हाफको ३३ औं मिनेटमा अग्रता दोब्बर बनाएका उनले ५४ औं मिनेटमा तेस्रो गोल गर्दै ह्याट्रिक पुरा गरे।

सानदार जितका लागि सलाह र मानेले १–१ गोलको योगदान गरे। दोस्रो हाफको ४७ औं मिनेटमा मोहम्मद सलाहरले गोल गरे भने ४९ औं मिनेटमा साडियो मानेले गोल गरे।

घरेलु टिमले भने लिभरपुलविरुद्ध सान्त्वना गोलसमेत गर्न सकेन। त्यसैले, लिभरपुलले च्याम्पियन्स लिगका सुरुवाती तीनै खेलमा क्लिन चिट राखेको छ।

सानदार जितका साथ ९ अंक बनाएको लिभरपुल समूह डी को शीर्षस्थानमा छ। त्यस्तै एटलान्टा भने तेस्रो स्थानमा छ।

समूह डि अन्तर्गत नै सम्पन्न अर्को खेलमा आयाक्सले मिजुल्यान्डलाई २–१ गोले हराएको छ। जितसहित आयाक्स दोस्रो स्थानमा छ भने मिजुल्यान्ड अंकविहीन रहँदै समूहको पुछारमा छ।