म्यानचेस्टर युनाइटेड युरोपा लिगको क्वार्टरफाइनलमा

काठमाडौं– अष्ट्रियन क्लब लास्कलाई हराउँदै इंग्लिस क्लब म्यानचेस्टर युनाइटेड युरोपा लिगको क्वार्टरफाइनलमा प्रवेश गरेको छ।

युनाइटेडकै घरेलु मैदान ओल्ड ट्राफोर्डमा सम्पन्न दोस्रो लेगको खेलमा २–१ गोलअन्तरले पाहुना टिमलाई हराउँदै उसले क्वार्टरफाइनलमा स्थान बनाएको हो।

खेलको पहिलो हाफ गोलरहित बराबरीमा रोकिएपछि सबै गोल दोस्रोे हाफमा सम्भव बन्यो। ५५ औं मिनेटमा फिलिप विसेन्जरले गोल गर्दै पाहुना टिमलाई सुरुवाती अग्रता दिलाएका थिए। त्यसको दुइै मिनेटमै युनाइटेडमा जेसी लिंगार्डले गोल गरेपछि खेल बराबरीमा आयो।

निर्धारित समयको दुई मिनेटअघि एन्थोनी मार्सलले गोल गरेपछि भने युनाइटेडले दोस्रो लेगको खेल पनि जित्यो।

यसअघि मार्च १२ मा लास्कको मैदानमा भएको पहिलो लेगको खेलमा पनि युनाइटेडले ५–० गोलअन्तले जित निकालेको थियो। यसर्थ उसले समग्रमा ७–१ गोलअन्तरको सानदार जित निकाल्दै क्वार्टरफाइनल प्रवेश गरेको छ।

युनाइटेडले सेमीफाइनल प्रवेशका लागि डेनमार्कको क्लब कोपनहेगनसँग अगस्ट ११ मा प्रतिस्पर्धा गर्नेछ।