सुरुवाती अग्रता गुमाउँदा युभेन्टस पराजित

एजेन्सी– इटालियन सिरी ए अन्तर्गत गएराति सम्पन्न खेलमा लिगलिडर युभेन्टस उडिनेससँग पराजित भएको छ।

उडिनेसको डासिया एरिना रंगशालामा सम्पन्न खेलमा युभेन्टसले २–१ गोलअन्तरको हार बेहोरेको हो।

उडिनेसको जितमा एलिज नेस्तोरोभ्स्की र सेको फोफनाले गोल गरे। उनीहरुले दोस्रो हाफको ५२ औं र इन्ज्युरी समयमा गोल गर्दै घरेलु टिमलाई जित दिलाए।

यता खेलको ४२ औं मिनेटमै युभेन्टसको माथिस डि लिग्टले गोल गर्दै पाहुना टोलीलाई सुरुवाती अग्रता दिलाएका थिए। सो अग्रतासँगै पहिलो हाफमा युभेन्टस एक गोलले अघि थियो।

तर दोस्रो हाफमा अग्रता कायम राख्न सकेन। र, अन्त्यमा २–१ गोलको हार बेहोर्यो। हारसँगै युभेन्टसको उपाधि यात्रा लामो भएको छ। उसलाई लिगविजेता बन्नको लागि ३ अंक आवश्यक छ।

३५ खेलबाट युभेन्टसले अंकतालिकामा ८० अंक बनाएको छ। समान खेलबाट ७४ अंक जोड्दै एटलान्टा दोस्रो स्थानमा छ भने इन्टर मिलान ७३ अंकका साथ तेस्रो स्थानमा छ। विजेता उडिनेस ३९ अंकका साथ अंकतालिकाको १५ औं स्थानमा छ।