डेबलाको पासमा रोनाल्डोको गोल, युभेन्टसको सहज जित

एजेन्सी– इटालियन सिरी ए अन्तर्गत गएराति सम्पन्न खेलमा लिग लिडर युभेन्टसले लाजियोलाई पराजित गरेको छ।

युभेन्टसको एलियान्ज रंगशालामा सम्पन्न खेलमा घरेलु टिमले २–१ गोलअन्तरको जित निकालेको हो।

जितका लागि दुवै गोल फरवार्ड क्रिस्टियानो रोनाल्डोले गरे। उनले खेलको ५१ औं मिनेटमा पेनाल्टीमा पाएको अवसरको सदुपयोग गर्दै गोल गरे। त्यसको तीन मिनेट लगत्तै व्यक्तिगत दोस्रो गोल गर्दै रोनाल्डोले दुई गोलको अग्रता बनाए। दोस्रो गोलका लागि पाबलो डेबलाले पास उपलब्ध गराए।

रोनाल्डोले ६६ औं मिनेटमा हेडमार्फत प्रहार गरेको बल क्रसबारमा लागेर बाहिरिएपछि उनको ह्याट्रियक योजना सफल बनेन, बरु लाजियोका सिइरो इमोबाइलले ८३ औं मिनेटमा पेनाल्टीमार्फत सान्त्वना गोल फर्काए।

लाजियोले एक गोल फर्काएसँगै खेलको स्कोरिङ २–१ मा टुंगियो। जिसँगै शीर्षस्थानको युभेन्सटसले जितसँगै अंकतालिकामा ८० अंक बनाएको छ। ऊ उपाधिबाट ५ अंक मात्र टाढा छ भने पराजित लाजियो चौथो स्थानमा पुगेको छ। लामो समय दोस्रोस्थानमा कब्जा जमाएको लाजियो पछिल्ला खेलमा जम्न नसक्दा चौथो स्थानमा पुगेको हो।

अंकतालिकामा दोस्रो स्थानको इन्टर मिलानको ७२, तेस्रो स्थानको एटलान्टाको ७१ र लाजियोको ६९ अंक छ।

सिरी ए अन्तर्गत आज राति एटलान्टाले बोलोग्नासँग र सौसेलोले मिलानसँग प्रतिस्पर्धा गर्ने छ।