साविक विजेता सिटीलाई हराउँदै आर्सनल एफए कपको फाइनलमा

साविक विजेता म्यान्चेस्टर सिटीलाई हराउँदै आर्सनल एफए कपको फाइनलमा पुगेको छ। वेम्ब्ले रंगशालामा सम्पन्न खेलमा सिटीलाई २–० गोल अन्तरले हराउँदै आर्सनल फाइनल प्रवेश गरेको हो।

सेमिफाइनलमा जितका लागि पियरर इमिरिक अबुमयाङले दुवै गोल गरे। उनले १९ औँ मिनेटमा गोल गर्दै क्लबलाई सुरुवाती अग्रता दिलाए। सो गोलसँगै पहिलो हाफमा आर्सनल एक गोलले अघि रह्यो।

दोस्रो हाफमा पनि अबुमयाङले नै गोल गरे। ७१ औं मिनेटमा गोल गर्र्दै उनले २–० गोलको जित सुनिश्चित गरे। जितसहित १३ पटकको विजेता टोली पुनः फाइनलमा प्रवेश गरेको हो।

अब आर्सनलले अगस्त १ मा हुने फाइनल खेलमा म्यानचेस्टर युनाइटेड र चेल्सीको आज राति हुने खेलको विजेता टोलीसँग प्रतिस्पर्धा गर्ने छ।

एफए कप युरोपा लिगका लागि क्वालिफायर प्रतियोगिता समेत हो। जारी इंग्लिस प्रिमियर लिग(ईपीएल)मा आर्सनल १० औं स्थानमा रहेका कारण घरेलु लिगबाट युरोपा लिगमा प्रवेश गर्ने अवसर अति कम मात्रामा जिवित छ।

जसकारण ऊ एफए कपको सहायताबाट लिगमा स्थान बनाउन चाहान्छ।

यता सिटीले गत वर्ष छैटौं पटक कप जितेको थियो। त्यसपछि क्लबका सहायक प्रशिक्षक माइकले आर्टेटा नयाँ चुनौतिका लागि आर्सनल प्रवेश गरेका थिए। गत वर्षको आफ्नै क्लब सिटीलाई हराएर उनले पहिलो सिजनमै आर्सनललाई कपको फाइनलमा पुर्याएका छन्।

एजेन्सी