‘सरकारले दिएको राहत हप्तादिन पुगेन, उहाँहरूले नदिए भोकै पर्छौं’ (फोटोफिचर)

काठमाडौं– प्रधानमन्त्री केपी शर्मा ओलीले दुई हप्ताअघि नै ८० करोड रूपैयाँ बराबरको राहत बाँडिएको बताएका थिए।

तर, सरकारले बाँडेको राहत कतिले पाए, कतिले पाएनन् लेखाजोखा छैन। राहत नपाएको र घरमा चुलो नबलेको भन्दै राजमार्गमा घर जानेहरूको ताँती अझै कम भइसकेको छैन।

सरकारी राहत पाउनेहरूले पनि पर्याप्त पाएनन्। अधिकांश स्थानीय तहले ५–१० किलो चामल, एक किलो दाल, एक पाकेट नुन र तेल राहत स्वरुप बाँडेको थिए। तर, त्यसले एउटा परिवारलाई कति दिन पुग्छ? प्रश्न तीनै तहको सरकारलाई...

मंगलबार काठमाडौंमा खानाको लाइनमा बसेकाहरू भन्दै थिए– “सरकारी राहत एक हप्ता पुगेन, उहाँहरूले नदिए के खाएर बाँच्नु?”

सरकारी राहत सकिएर चुलो बल्न छोडेपछि विभिन्न स्थानमा विभिन्न संघसंस्था र क्लबले राहत बाँडिरहेका छन्।

११ दिनदेखि केशवधाम हिन्दू स्वयंसेवक संघ नेपाल र नव दृष्टिकोण युवा क्लब मिलेर काठमाडौं महानगरपालिका वडा नम्बर ९ को सकुम्बासी बस्तीमा खाना बाँडिरहेका छन्। उनीहरूलाई सेभ हेभन फाउण्डेशनले सघाइरहेको छ।

संघले खाना बनाएर परिवारका सदस्यअनुसार खाना बाँड्छ। दैनिक एक हजार घरपरिवारलाई खाना वितरण गर्दै आइरहेको क्लबका वरिष्ठ सल्लाहकार टेकबहादुर थापाले जानकारी दिए। राप्रपा संयुक्तका केन्द्रीय सदस्यसमेत रहेका थापाले भने, “अन्य ठाउँमा पनि समस्या भए हामीलाई खबर गर्नुस्।”