पौडेल समूहको प्रस्ताव– अनुशासनको कारबाहीमा परेका सबैलाई आममाफि दिऊँ

काठमाडौं– नेपाली कांग्रेसका बरिष्ठ नेता रामचन्द्र पौडेल समूहका नेताहरूले सभापति शेरबहादुर देउवालाई भेटेका छन्। बिहीबार बिहान बालुवाटारमा प्रधानमन्त्रीसमेत रहेका देउवालाई भेटेर क्रियाशील सदस्यता विवाद देखिएका २१ जिल्लामा विवाद समधान गरेर मात्रै वडा अधिवेशन गराउन आग्रह गरेका छन्। 

देउवाको गृह जिल्ला डडेल्धुरामा समेत विवाद देखिएकाले समधान खोजेर मात्रै वडा अधिवेशन गराउनुपर्ने माग पौडेल समूहको छ। बरिष्ठ नेता पौडल, महामन्त्री डा. शशांक कोइराला, पूर्वमहामन्त्री प्रकाशमान सिंह, नेताहरू डा. मिनेन्द्र रिजाल र जीवन परियारले देउवालाई भेटेका हुन्। 

भेटमा पौडेल समूहले अनुशासनको कारबाहीमा परेका सबै नेता कार्यकर्ताहरूलाई आममाफि दिनुपर्ने धारणा राखेका थिए। स्थानीय तहको निर्वाचन नजिकै आएकाले कारबाही फुकुवा नगर्दा चुनावी परिणाममा असर गर्ने भन्दै पौडेलसमूहले कारबाही फुकुवाको माग गरेको हो।

‘हामीले डडेल्धुरा  लगायत २१ जिल्लाको विवाद मिलाएर मात्रै पालिका अधिवेशन गर्न माग गरेका छौं,’ देउवालाई भेट्न पुगेका पौडेल समूहका नेता जीवन परियारले नेपाल समयलाई भने। यस्तै वडा अधिवेशन सकिएका जिल्लामा पालिका तहको अधिवेशन तत्काल नगर्न पौडेल समूहले माग गरेको छ। विवादित २१ जिल्लाका वडा अधिवेशन सकिएपछि एकै पटक पालिका अधिवेशन गर्नुपर्ने  माग पौडेल समूहको छ।

अधिवेशनको मिति हेरफेर गर्ने अधिकार निर्वाचन समितिलाई दिइएकाले पालिका अधिवेशनको सम्बन्धमा आवश्यक निर्णय लिन आग्रह गर्ने विषयमा समेत छलफल भएको बताइएको छ।

भेटमा सभापति देउवाले विवाद समाधानका लागि साथिहरूलाई जिम्मा दिइएको बताएको परियारले जानकारी दिए। २१ जिल्लामा क्रियाशील विवाद नमिल्दा वडा अधिवेशन अनिश्चित बनेको छ।