एमसीसी मुलुकको हितमा छैन : एमाले

काठमाडौं– प्रमुख प्रतिपक्षी दल नेकपा (एमाले)ले एमसीसी मुलुकको हितमा नभएको निष्कर्ष निकालेको छ। बुधबार संसद् भवनको ल्होत्से हलमा बसेको पार्टी संसदीय दलको बैठकले यस्तो निष्कर्ष निकालेको हो। 

यसैगरी बैठकले निर्वाचन आयोग एमाले टुक्र्याउन उद्यत रहेको, दार्चुला घटनामा सरकारी व्यवहार भारतीयसामु लम्पसारवादी देखिएको पनि निष्कर्ष निकालेको छ। एमाले यस्ता विषयमा मूकदर्शक भएर नबस्ने भट्टराईले बताए। 

बैठकमा अध्यक्ष केपी ओलीले संसद् बैठक अवरुद्ध गर्ने संकेत गरे। पार्टीले कारबाही गरेका १४ जना सांसद उपस्थित नभए बैठक चल्न नदिने ओलीले बताए। ‘हाम्रो पार्टी फुटाउने सभामुखले अध्यक्षता गर्ने हुनाले त्यहाँ पुग्ने स्थिति छैन। गैरसांसद उपस्थित भएर संसद् चल्न सक्दैन। त्यसो हो भने हामी पहिलेका सांसदहरू ल्याउछौं,’ ओलीको भनाइ उद्धृत गर्दै एक सांसदले भने।

संसद् अधिवेशन आज सुरु हुँदैछ र पहिलो बैठक अपराह्न ४ बजे बस्दैछ।

माधवकुमार नेपालको नेतृत्वमा एमाले फुटेर नेकपा (एकीकृत समाजवादी) पार्टी गठन हुनुअघि एमालेले नेपालसहित १४ जना सांसदलाई कारबाही गरेको थियो। तर, सभामुख अग्निप्रसाद सापकोटाले कारबाहीको सूचना टाँस नगरिदिएपछि उनीहरुमाथि भएको कारबाही वैध भएको छैन।