कास्कीका ७२ मध्ये ६९ वडामा कांग्रेस अधिवेशन सम्पन्न

पोखरा– नेपाली कांग्रेस कास्कीको वडा अधिवेशन अन्तर्गत कास्कीका ७२ वटा वडामध्ये प्रायः वडामा अधिवेशन सम्पन्न भएको छ। सो अधिवेशनले वडा सभापति सहितको कार्यसमिति र क्षेत्रीय प्रतिनिधिहरु चयन गरेको छ। 

पोखरा महानगरपालिका वडा नं. २० र २६ तथा मादी गाउँपालिका ४ मा वडा अधिवेशन हुन बाँकी रहेको निर्वाचन प्रमुख आर सी विमलले जानकारी दिए। ‘तीन वटा वडामा आज भोलिमा हुन्छ, होला अरु सबै वडामा अधिवेशन भइसक्यो,’ उनले भने। 

उनका अनुसार पोखरा–२० र मादी–४ मा वर्षाका कारण अधिवेशन हुन नसकेको हो भने पोखरा–२६ मा विवाद उत्पन्न भएको छ। केही नेता र पूर्व मन्त्रीहरुको एउटा गुटले मनोमानी ढंगले कार्यसमिति र क्षेत्रीय प्रतिनिधि चयन गरेको भन्दै केही क्रियाशील सदस्यहरुले विरोध जनाएका छन्। 

मनोमानी ढंगले प्रतिनिधि र कार्यसमिति चयन गरेको भन्दै आफूहरुले निर्वाचन कार्यालय र केन्द्रीय समितिमा उजुरी गरेको क्रियाशिल सदस्य सुदीपराज ढुंगानाले बताए। पूर्व मन्त्री तारानाथ रानाभाट र यज्ञबहादुर थापा लगायतको समूहले वडा नम्बर २६ मा आफ्ना मान्छे मात्रै सिफारिस गरेको आरोप उनको छ।