पोखरा महानगर कांग्रेस सभापतिमा पराजुलीको उम्मेदवारी घोषणा

पोखरा– गंगाधर पराजुलीले नेपाली कांग्रेस पोखरा महानगरपालिका समितिको सभापतिमा उम्मेदवारी घोषणा गरेका छन्। पराजुली नेपाली कांग्रेसको १३ औं महाधिवेशनमा कास्की जिल्ला समितिको सचिव पदमा पराजित भएका थिए। 

उनले आफूलाई कुनै गुट र समूहको नभई नेपाली कांग्रेसको साझा उम्मेदवार भएको दाबा गरे।  ‘केन्द्रको हकमा म शेरबहादुर, रामचन्द्र, सिटौला सबैको हुँ’, उनले भने,  ‘कास्कीको हकमा म शुक्रराज, महादेव, तारानाथको उम्मेदवार हुँ।’ 

तर नेपाली कांग्रेसका कार्यकर्ता  भने उनलाई संस्थापन पक्षको उम्मेदावारको रुपमा चिन्छन्। कांग्रेस कास्कीका एक सदस्यका अनुसार उनले आफूलाई संस्थापन पक्षमा राखेर उम्मेदवारी घोषणा गरेका हुन्। ‘उहाँको भावभंगिामाले उहाँ संस्थापन पक्षको हो भन्ने देखाउँछ’, ती सदस्यले भने, ‘संस्थापन इतरका कार्यकर्ताको भावना बटुल्न उहाँले सबै पक्षको हुँ भन्नुभएको हो।’ पराजुली नेपाल पत्रकार महासंघका पूर्वउपसभापति रन्यूनतम पारिश्रमिक निर्धारण समितिका पूर्वअध्यक्ष हुन्।

पोखरा महानगरपालिकाको सभापति बन्न पराजुलीबाहेक अन्य चार जना पनि आकांक्षी छन्। अन्य आकांक्षीमा सुरेन्द्र विजुक्छे, मिलन तिवारी, मोहन बाँस्तोला र रामराज लामिछाने छन्।  तीमध्ये रामराज लामिछाने र सुरेन्द्र विजुक्छे पौडेल पक्षका मानिन्छन् भने अन्य सँस्थापन पक्षका मानिन्छन्।  कांग्रेसको वडा अधिवेशन कास्की जिल्लामा शुक्रबार हुँदैछ।