चिकित्सा शिक्षा र स्वास्थ्य क्षेत्रमा सुधारको माग गर्दै १७ औं पटक अनशन बसिरहेका डा गोविन्द केसीप्रति ऐक्यवद्धता जनाउँदै काठमाडौंमा प्रदर्शन भएको छ ।
शनिबार काठमाडौंको माइतीघर मण्डलमा भएको प्रदर्शनमा विद्यार्थी, अभियन्ता, चिकित्सक र सर्वसाधारणको सहभागिता थियो ।
प्रदर्शनमा सहभागीहरुले डा केसीका माग यथाशिघ्र पूरा गर्न सरकारसँग माग गरेका छन् ।
डा केसी ६ दिनदेखि डडेलधुरामा अनशनरत छन् । एक निजी घरमा अनशन बसेका उनकोे स्वास्थ्यमा समस्या देखिएपछि उनलाई शुक्रबारदेखि जिल्ला अस्पतालमा सारिएको छ ।
बारम्बारको अनशनले रुग्ण भइसकेको सत्याग्रही डा केसीको शरीर यसपटकको अनशनमा चाँडै गल्न थालेको उपचारमा संलग्न चिकित्सकले बताएका छन् ।