माधव नेपालमाथि खनिए महेश बस्नेत, भने- दामपछि पाउमा सांसद चढाउँदैछन्

काठमाडौं- नेकपा एमालेका नेता महेश बस्नेतले माधवकुमार नेपाललाई मन्त्री पदका लागि दल टुक्र्याएको आरोप लगाएका छन्। नेपालले सांसदहरुलाई शेरबहादुर देउवाको पाउमा चढाउन खोजेको टिप्पणीसमेत बस्नेतले गरे। 

ललितपुरको लुभुमा शनिबार युथ फोर्सले आयोजना गरेको कार्यक्रममा बस्नेतले भने, ‘सुन्दैछु, ६ जनाले मन्त्री खाँदै छन्। माधव नेपालले हिजो प्रधानमन्त्री खान राजाको पाउमा दाम चढाउनुभयो, अहिले मन्त्री खानका लागि शेरबहादुर देउवाको पाउमा आफ्ना सांसद चढाउँदै हुनुहुन्छ।’

नेता नेपालले यही लोभले दल विभाजित गरेको आरोप उनको थियो। ‘माधव कमरेड आफू नेतृृत्वमा हुँदा एमालेलाई ३३ सिटमा झार्नुभएको थियो,’ उनले भने, ‘माधव नेपालले झलनाथ खनालको साथ लिएर पार्टीलाई माओवादीमा विलय गराउँदै हुनुहुन्थ्यो,' त्यतिबेला केपी ओलीले रोक्नुभयो।’ 

नेता बस्नेतले एमाले बनाउने जिम्मेवारी सबैको रहेको भन्दै माधव नेपालको पछि नलाग्न सबै नेता तथा कार्यकर्तालाई आग्रह समेत गरे।