मन्त्रिमण्डलले चाँडै पूर्णता पाउँछ : कानुनमन्त्री कार्की

विराटनगर- नेपाल सरकारका प्रवक्तासमेत रहेका कानुन, न्याय तथा संसदीय मामिलामन्त्री ज्ञानेन्द्रबहादुर कार्कीले  मन्त्रिपरिषद्‍ले चाँडै पूर्णता पाउने बताएका छन्। गठबन्धन सरकारको संस्कृतिलाई ध्यानमा राखी सबैसँग छलफल गरी छिट्टै मन्त्रिपरिषद् विस्तार गरिने उनले बताए। 

शनिबार विराटनगर विमानस्थलमा सञ्चारकर्मीसँग कुराकानी गर्दै मन्त्री कार्कीले स्थिर सरकारका लागि गठन्बन्धकबाहेक अन्य दलहरुसँग पनि छलफल भइरहेको मन्त्री कार्कीले बताए। समयको महत्व बुझेर सरकारले जनताले अनुभूति गर्ने गरि विकास निर्माणका कार्य सुरु गरिने उनले बताए। राजनीतिक दल सम्बन्धी अध्यादेश आवश्यकता र बाध्यताले ल्याएको प्रष्टीकरण दिएका कार्कीले भने, ‘आगामी संसद् अधिवेशनमा यस सम्बन्धमा छलफल हुनेछ।’ 

फरक प्रसंगमा मन्त्री कार्कीले नेपाली कांग्रेसको महाधिवेशन अब नसर्ने बताए। भदौ १८ गते कांग्रेसको वडास्तरीय अधिवेशन सुरु हुँदैछ। कांग्रेस केन्द्रीय महाधिवेशन भने मंसिर ९ गतेदेखि १३ गतेसम्म हुनेछ।