आर्मी झापा गोल्डकपको फाइनलमा

काठमाडौं- विभागिय टोली त्रिभुवन आर्मी चौंथो संस्करणको झापा गोल्डकप फुटबलको फाइनल प्रवेश गरेको छ । शनिबार भएको दोस्रो सेमिफाइनल खेलमा दाउफिन्सलाई १-० गोल अन्तरले पराजित गर्दै आर्मी प्रतियोगिताको फाइनल प्रवेश गरेको हो । 

आर्मीले खेलमा आत्मघाती गोलबाट सुरुवाती अग्रता लिएको थियो । दाउफिन्सका सिलु मार्टिन्सको आत्मघाती गोलमार्फत आर्मी विजयी भएको हो । खेलको २३ औं मिनेटमा सिलुले आत्मघाती गोल गरेका थिए । उनले आफ्ना गोलरक्षकलाई हेडर मार्फत ब्याक पास दिने क्रममा गोल गरेका थिए । 

अब आर्मीले उपाधिका लागि आयोजक टोली झापा-११ सँग सोमबार भिड्ने छ । झापा-११ शुक्रबार भएको पहिलो सेमिफाइनलमा थ्रि स्टार क्लबलाई ट्राइबेकरमा ३-१ ले पराजित गर्दै फाइनल प्रवेश गरेको थियो ।

प्रतियोगिताको विजेता टोलीले १२ लाख ५५ हजार प्राप्त गर्ने छ भने उपविजेता टोलीले ६ लाख ५ हजार प्राप्त गर्ने छ ।