नेपाली फुटबल विकासका लागि चिन र एन्फाबिच सम्झौता

काठमाडौं- नेपाली फुटबल विकासका लागि चाईनिज फुटबल संघले सहयोग गर्ने भएको छ । नेपाली फुटबल विकासका लागि अखिल नेपाल फुटबल संघ (एन्फा) र चाईनिज फुटबल संघबीच बिहिबार सम्झौता भएको हो ।

एन्फा अध्यक्ष कर्मा छिरिङ शेर्पा र चाईनिज फुटबल संघका अध्यक्ष चाई झिन्हुआबीच चार बर्षका लागि सम्झौता पत्रमा हस्ताक्षर भएको छ । सम्झौता अनुसार चिनले राष्ट्रिय टिम, पुर्वाधार र फुटबलको प्राविधिक बिषयको विकासमा सहयोग गर्नेछ । 

सम्झौतासँगै राष्ट्रिय टिमको आदान प्रदान, पुर्वाधार विकासमा सहकार्य, प्राविधिक विकासमा चीनले नेपाललाई सहयोग गर्नेछ । सम्झौतापछि बोल्दै एन्फा अध्यक्ष शेर्पाले यस सहकार्यले नेपाली फुटबल विकासको लागि चीनले प्रवर्दन गर्ने बताए । 

‘यस सम्झौताले दुवै देशलाई फाइदा पुग्ने गरि पूर्वाधार विकासमा जोड र राष्ट्रिय टिमको आदानप्रदान जस्ता कार्यहरु हुनेछ,’ अध्यक्ष शेर्पाले भने, ‘अब मोफसलमा आयोजना हुने प्रतियोगितामा चीनको प्रान्तीय र तेस्रो डिभिजनका क्लबले सहभागिता जनाउने छन् ।’

यस्तै चाईनिज फुटबलका अध्यक्ष झिन्हुआले महिला र युवा टिमबीच सम्बन्ध बनाउने आधार तयार भएको बताउदै नेपालसँग मिलेर फुटबलमा धेरै काम गर्न सकिने बताए ।